De'Manai Long Beyak Ngo-o Tau

Tu' juang demanai mengut de'manai mukun, de'manai mandeng petu-un cin dapun,
Ompah nyu-un setinting pu-un, pesau ekzos peji ku-un, pono ngap tai pala' tu-un,
Jawai ngerungun di nyelat abun, de'manai ngalut mepik tuntun, alut dumit ji alut utun,
Ngea' luai bana re ngeduyun, lada cu' sa'o diam lungun, pengepa awen alak ca udun.

Jam 7 koma ne meki, jam de'manai uli' naat pesi, dalau iut alo songai meti,
Adi abi' ne oban de'manai di, ti pah utun pella jenama sue, ketai pala' kem besi,
Mateng palo ngerongau kae, bisnes peji 'tukar barang lagi', pentung re ke juan atuk tabi,
Menga' du te' omak lekai kati, ngalak ke bileng kenai re abi', nyu-uk engkin kojau tung ubi.

Pekauh togan de'manai belian, metit jatung labo ke tenggan, mibui toyang toyau selawan, De'manai beyak muat oman, oman pah ketan di dempau senawan, senawan beley-en teytai jembatan,
De'manai baran ke' linget tapan, pekelem toa nauk ke' bekan, mita dian nta pe un awai bua' bo-an,
Deco-deco kisek re ke' lasan, key-ah key-ah kedau re san, nyepik tawai mo-o bongak nta un poyan.

Tading kenai bali ketau, koma ne 2 jam meka ne pesau, kena e ke nujuk telit belua' tau,
Un poyan ne de'manai kancau, bawa' kelu' ke mita kojau, oyan sampau man re ketai mejau,
De'manai iut buwau cin apau, ngala' ke nyua pegelam ngayau, kelu' ke pasa pabat payau,
Nta majan re mecin lepau, cin mudung a-ang mudung empau, beng teku-uk asu ne teypo lolau.

Betakek batek de'manai long beyak, de'manai apaq maam golak, nta di takut neylek pak bayak,
Adung ke' ose pe di nompak, ngelonyai teneng naam sala', palo un besa' bada' ke eda kayak,
Najen sik ke pekata oyan katak, ajai sebelak cuk ilu gerak, nyele-en pe sik re ke mimum tejalak,
Ja ne poyan de'manai long beyak, pelapa asat tau pah belua', dalau tentan mata tau nantak.

De'manai beyak de'manai makang, nta di putuk leto balang, beti' pegak di eda engkin nyenang,
Tu' sarip dau toyau takang, pebo tabang di kelap toyang, nta sik re nuen le ke nyampau tonyang,
Bela'u liang enan payang, bayak mabang petegep anang, atek ramey lute sik de'manai beregang,
Lepa ntu', ma-ap ke odang, odang lata' di ke' enta' batang, de'manai nyolang nta tisen kepang.

Tegu' tau bala jam 5 meka, ayen le mita de'manai lovia, sebey-en mentem mata tau lenca,
Jawai tengit de'manai ngasa, de'manai lovia nta tisen nyara, nyadu ne ke trining main bola,
Kua' tega ngenayo osa, kua' poyan ngenayo laja, laja bola cin argentina maradona,
Ngelamun ke juara ke' piala kebana, singket oman te oyan sejarah, je'dai lu'te nombor 2.

Toyau tiling ngan toyau wangkuk, toyau enjin ma'o ledau petetuk, kenai alem ne ja mekep lepu',
De'manai mumpuk oman tai taup, ngelekai kabuk un pe siyai atuk, lepa ntu' penco pe tai ke' aju',
Ngening katuk cin amai bio', melalu' bangen di nepap uju', pekalah pe tamen keleyko dadu',
Uli' cin kubu', de'manai kadu', lagu pekeh beka' di ngao lepu', belian alu' peji belian keruk.

Beto-en edang ke' awang deman, jawai maga de'manai toran, pauh pui di oyan kemajuan,
Niitiu sa'ai de'manai ke' sepan, balu' gaya re mita pengoman, loh ke makan kriit leto kapan,
Ulu babui di maap ke' lasan, atek bangen tawai de'manai uyan, tega layan pesemaik apan,
Pek matan bali jakan, petin tua' ne leto ngeba'an, nyelao mee ke' de'manai dereba lepan.

Selum kimet de'manai mengut, mecak ontat di petenup santet, makan kriit de' selap kejet,
Lepa nyantep, nyain pe ti keringut, dut-delut kriit leto keyrek, taan kadep re de' mencam kancet,
Nyarat aut di ngecet kelabet, matet kadep re de' ke' bolan pet, alai de'manai ne ngeket salet,
De'manai beyak de'manai menget, utung alem di luntu' ngeyket, pentung bio' ledau toyau kerawet.

De'manai beyak, bawa'-bawa' tepat panak,
Ngimet denak, ngimet teneng udip bayak,
Ayen obak mita penyalak, mita kayak tuak,
Nyain na bareng mudip neypo usun tanak

Silap budget pulak

1'st kurasa, ku bertindak bodoh kat highway.. huhu..smalam le.. actually, ku saje nak try jer.. panic a while..syukur ku sampai jg kat hentian seremban dlm kelajuan 90km/j..nearly 50minutes from shah alam.. usually, 30minutes jer..nyesal tersangat2..xmo wat lagi..tp smalam ku langar mati byk flying objects..padan muke die.. yeye..yg plg best, sampai jer umah, trus msk dlm selimut.. huhu..